verwelkom u

Wie is Bothaville.com?

Hier in die Noord-Wes Vrystaat, by die samevloeiing van die Vals- en die Vaalrivier is die dorp Bothaville geleë. Dit is welbekend as die Mieliehoofstad van Suid-Afrika. Wie het immers nog nie van NAMPO gehoor nie? Dit is egter nie net die Mieliehoofstad nie, maar ook die tuiste van Bothaville.com, ‘n unieke vernuwings- gemeente van Jesus Christus.

Bothaville.com het op 16 Oktober 2004 ontstaan uit ‘n behoefte vanuit die gemeenskap vir geestelike vernuwing gebaseer op sterk Christelike beginsels met JESUS CHRISTUS as die HOOF.

Die gemeente begeer en ondersteun die gemeenskap van Christengroepe en ander gemeentes wat dieselfde doelwitte nastreef.

In hierdie opsig sal Bothaville.com met ander bevolkings- en taalgroepe saamwerk om die saak van Jesus Christus te bevorder soos wat dit in ons visie weerspieël word :

Om lewende stene te wees wat in liefdevolle verhoudings gebou word
Op die FONDAMENT van JESUS CHRISTUS
Deur die GAWES van die HEILIGE GEES
Tot ‘n TEMPEL/BIDDENDE GEMEENTE
Sodat die WÊRELD GOD die VADER daarin kan ONTMOET!

Ons embleem

Die embleem bestaan uit ‘n kruis wat deur twee reghoeke gevorm word. Die kruis binne die embleem beeld Jesus Christus as die Hoof van die gemeente uit. Daar is verder ook twee ander elemente ter sprake binne die simbool van die kruis, nl om te ontvang en om te gee. Die boonste reghoek van die kruis beeld die woorde KOM KRY uit en die onderste reghoek die woorde GAAN GEE. Dit is ook die opdrag van Jesus Christus aan Sy dissipels.

Die byskrif by die embleem lui ook toepaslik: 'n Gemeente vir die Gemeenskap.